Сочні з творагам: проста, хутка і смачна

Рабіла сочні па рэцэпце  адсюль. Рэцэпт вельмі падрабязны, усё распісана па кроках. Што важна - зыходная колькасць прадуктаў указана акурат такая, як трэба. А то часта калі робіш нешта па рэцэпце - то замнога,  то замала атрымліваецца. А тут начынкі акурат хапае на колькасць цеста (усяго атрымліваецца 16 не вельмі вялікіх сочняў). Выпякаюцца вельмі хутка: за 15-20 хвілін.

Асабліва смачнае гэтае печыва, як добра астыне (лепей усяго - на другі дзень (калі дажыве) :))

Пірог з варэннем

У нас яго называюць “крышонка”. Відаць таму, што ён вельмі крохкі. Ці таму, што мае адмысловы выгляд.

Для прыгатавання такога пірага спатрэбяцца: 2 яйкі, шклянка цукру, сода, пачак маргарыну, каля 600-700 г. мукі, густое варэнне (лепш з кіслых ягад ці садавіны, ідэальна – са сліў).

Маргарын трэба загадзя растапіць і астудзіць, бо ў цеста ліць гарачым яго нельга. Яйкі расцерці з цукрам, дадаць адгашаную ў воцаце соду. Туды ж уліць растоплены маргарын, перамяшаць. Дадаючы пакрыху муку, замясіць густое цеста. Яно павінна быць эластычным і лёгка адставаць ад рук Адразу кавалачак цеста аддзяліць і пакласці ў маразілку. Астатняе раскатаць у пласт прыкладна 2-3 см, выкласці на процівень. Каб не сцякло варэнне, па краі можна зрабіць невялікі борцік. Паверхню пірага змазаць варэннем, раўнамерна яго размеркаваць. А цяпер дастаем замарожаны кавалачак цеста і на буйную тарку трэм яго проста над нашым пірагом, зноў-такі, раўнамерна пакрываючы слой варэння нацертымі кавалачкамі. Гэта рэкамендуецца рабіць перад самай адпраўкай пірага ў духоўку.

Выпякаць трэба 40-45 хвілін пры тэмпературы 220-240 градусаў.

Смачна есці!

Шарлотка: прасцей простага

Напэўна, самы вераснёўскі пірог :) Да таго ж зусім-зусім просценькі. Патрэбна:
5 яек, 1 шклянка цукру, 1 шклянка мукі, каля 1 кілаграма яблыкаў, карыца, ваніль, сода.
Яйкі з цукрам узбіць міксерам, усыпаць трошкі соды для пышнасці. У атрыманую сумесь дадаць муку, прыкладна шклянку, або трохі больш - цеста павінна быць як густая смятана.
Падрыхтаваць яблыкі - памыць, пачысціць, парэзаць кавалачкамі.
На дно формы кладзем паперу для выпечкі або змазваем яе алеем (паперу таксама), наліваем крыху цеста на дно, потым раскладаем кавалачкі яблыкаў, пасыпаем цукрам, карыцай, ваніллю. Далей заліваем астатняе цеста.
Ставім у напаленую духоўку (каля 200 градусаў) і выпякаем да з'яўлення карычневай скарыначкі - прыкладна 40-50 хвілін.

Смачна есці! Асабліва - з малаком!